Leseprobe: Böhme, Bei uns läft alles rund

Witwen miet Appetit

Witwen hon, wie jeder sieht,
an gesundn Appetit,
namm siech reichlich Zeit derzu,
denn ihr Maa, dar fahltn nu.
Langeweile treibn se aus
miet an opulentn Schmaus.
Kopp un Körper rausgeputzt,
werd de Rente gut genutzt.

Witwen tu garn viel verzehre,
weil se 's Liebesglück entbehre,
kumm an kaner Kneip' verbei,
weil se su verfrassn sei,
giern nooch Sahne, Eis un Torte,
dofir find mer kane Worte!
Hon su'n ausgeprächtn Drang
nooch 'nen schienen Resterang.

Se studiern de Speisekartn,
könn' es Assn kaum erwartn.
Vu dn Fläsch an greßtn Batzn
tue se genüßlich schmatzn,
könn' an Taller Klöß' verschlinge,
vun Dessert de feinstn Dinge,
schaufln Sisses in siech nei,
platzn ower net derbei.

Su ersetzt dar Nahrungsfluß
dan entbehrtn Sex-Genuß,
huln siech neie Lust oral,
hon doch kane anre Wahl!
Sette lang verblühte Mäd
tu uns anern werklich läd.
Ausgemustert sei se alle,
könn' kann Mannsbild mehr gefalle.

Nooch verlurner Liebelei
blebbt'n när de Frasserei.
Wenn se net noch 's Saufen larne,
gönn' mer ihn' dos Assn garne,
denn ah noochmittch nooch üm drei
wackln se in "Cafe" nei.

Nooch Genuß vu frischn Kuchn
tu se amol 's Grob besuchn,
daß se ihrn verblichnen Alln
in Erinnerung behaln,
könne, statt ihn ze umfange,
Witwenrente nu empfange.
Drüm werd sane Liebe jetzt
in Ernährung ümgesetzt.

Dos tut jeder Witwe gut,
gibt ihr neien Labnsmut.
Un mir gönn' ihrn bestn Bissn,
tut se doch ihrn Maa vermissn.
Denn när anes hält se frisch:
stets a reich gedeckter Tisch!